طاریم چیچکلری
آی سندستان گلدیم سن لن گؤروشم قهر ائتمیشدیم ایمدی گلدیم باروشام
بیرده ایچم چشمه لردن سرین سو بوردا دۆشن ائل لریوه قاروشام
ایمدی گلدیم گل باروشاق جان کیمی
قاروشاق بیربیره ات و قان کیمی
آنام طارم سیزه باخا بیلمیرم
نه گلدی گۆل لرین نیه سۏلوبدی
هر یانا باخارام غم غصه یاغار
ایستی قوجاقونوز قانله دۏلوبدی
منیم گؤزل شهریم طارم یاشاسون اۏردا منیم هر نه واروم یاشاسون
یاشول چالسون باغلاری بۏستان لاری اۆزوم ،انجیر لریم، ناروم یاشاسون
ساقلوقلان قال کله سنگ گئدیرم
گلیب سندن خداحافظ ائدیرم
ممکندی دای بورا یۏلوم دۆشمیه
قوشلار گؤروب لوعا سوندان اوشمیه
دومان باسوب اۆستوموزدن گئشمیه
ساقلوقلان قال کله سنگ گئدیرم
گلیب سندن خداحافظ ائدیرم
سندستان داغونون باشی اوجادیر
دومان گلسه گۆنوزوده گئجه دیر
چۏپان سسلر یۏلداش حالون نئجه دیر
ککلیک اۏخور داشلاردا چن آلتوندا
گۆلاب تک سو آخار چمن آلتونداتؤکمه زۆلفون چگینیوه بیچاره ائتمه یئل لری
رحم ائله عشق اهلینه ائتمه پریشان تئل لری
آی جمالون اۏ بولود زۆلفونده پنهان ائتگینن
ائتمه شرمنده گلستاندا آچولموش گۆل لری
سن گۆلنده غملر هر یاندا وار اۏلسا محو اۏلار
نازیله بیر دفعه باخسان حل ائدر مشکل لری
گر قدم قۏیسان باغا گۆل لر هامی شادلوق ائدر
ذوق ائدر عشقینده فریاد ائله سین بلبل لری
دلبریم آیسان گۆلن یا غنچه سن
هر نه سن بیر گؤرمگین پامال ائدر نیسکیل لری
آی اۆزوندور، سن اؤزون گۆل سن، اۆرک بیر داش کیمی
گوئیا گؤرمن گؤزومدن آخدوقی قان سئل لری
گل باهار اۏلدی ولی سن سیز صفاسوزدور چمن
گل سؤوندور گۆل لری آینودگینان غافل لری
دلبریم گل بیر جمالون من زیارت ائلییم
گلمه سن طغیان ائدر قان یاش توتار ساحل لری
من کی تک یانمام سنین عشقینده عالم لر یانور
آی کیمی بیرجه طلوع ائت قۏیما حیران ائل لری
سؤوله سلطانی محللی اؤز دیلینجه دردوی
اؤزگه دیل یاخشی ده اۏلسا ایستمم اۏ دیل لری
---------------------------
مرحوم امان اله سلطانی
سالوبدی سایه گنه غصه جانه آخشاملار
اۆرک گلیبدی بو غمدن فغانه آخشاملار
قارانلیق اۏلدی
هوا، قلبیمه چؤکوب ظۆلمت
گؤز آغلاماقلیقی ائتدی بهانه آخشاملار
قالوب بو گوشه ده یالقیز، اۏلوبدی گؤولوم قان
دوروب گؤرن گئدیم الله هایانه آخشاملار
گئدلمرم نئیلییم قۏرخولوق اۏلوبدی منه
لاچین[1] ووران قوش کیم آشیانه آخشاملار
فراق یار ووروب جانه اۏد، یانار جگریم
عذاب قبردن اۏلموش نشانه آخشاملار
خۏشا اۏ کس کی اۏتورموش کنار دلبره
باخارلار بیر بیرینه عاشقانه آخشاملار
فلک قۏجالتدی
منی عمرومون بهاری گئدیب
بۆکوبدی قدّیمی دؤنموش کمانه آخشاملار
رقیبه قسمت اۏلوبدی وصالی دلبریمین
منه نصیبدی غم جاودانه آخشاملار
بساط مئی منه
سنسیز اۏلوب جگر قانی
گؤزوم یاشی تؤکولور قانه قانه آخشاملار
فراق یار و جفای فلک سارالتدی منی
نۏلور خدا یئتم اۏ مهربانه آخشاملار
محال آرزودور بو اۆرکده، من گؤرمم
اۏ ماهیلن دۏلانام گلستانه آخشاملار
جمالی عمرومه آی دیر ایشیقلیقیمدی منیم
گلنده کلبمه اۏل نازدانه آخشاملار
گئجه یارالی کیمی یاتمارام فراقینده
آییق قالیب باخمارام آسمانه آخشاملار
اجازه وئرمه دی
پروانه تک دؤنم باشینا
سالام اؤزومی اۏدا شادمانه آخشاملار
یۆزون گؤر آینه ده قلبیمین اۏدون فکر ائت
هنر یۏخومدی چکم من بیانه آخشاملار
باخاندا آهویا اۏخشار، گۆلنده گۆلدی لبی
شیرین سؤزی ووروبان اۏد بو جانه آخشاملار
فراقا دؤزمگه سن عادت ائله سلطانی
سکوت ائله گیلن عارفانه آخشاملار
---------------------------
مرحوم امان اله سلطانی
[1] - لاچین: بالاجا قوش ، شاهین ، پرنده ی شکاری
فلک! یۏخدور وفان، سن سن وفالی کسلره دشمن
سئورسن هر یئری گۏلخۏن، سنه خۏش گلمیری گلشن
نه قدر سن جفاجوسان ییخیبسان چۏخ جوانمردلر
کی چۏن صالح لری سن ایستمن، دۏستوندور اهریمن
پیمبرلر اماملار یاخشی عادل شخص لر هرگز
سنین تیر جفاندان اۏلمییبلار بیر زامان ایمن
بؤیوک شاهلار سلاطین لر ز بس کی اؤلدوروبسن سن
ازلده قۏوزییبسان گؤولره وورموش یئره بیردن
کی سن چۏخ پهلوانلار رستم دستان لاری اگدین
نه قدری خار ائدیبسن بو جهاندا خسرو و بهمن
سنین شغلوندی اؤلدورمک داغوتماق غارته چکمک
اۏلورسان شاد و خندان سن ائشیتسن هر زمان شیون
فلک! من بیلمرم آخر سنه نئیلیبدی عشق اهلی
گرک هئچ چاتماسین کامه تؤکولسون قان یاشی گؤزدن
جفالی سۏلدوروبسان شاخه ده چۏخ غنچه لر، گۆل لر
ائدیبسن لال چۏخ بلبل لری چهچه ده سن گؤرسن
فلک شرم ائتگینن سلطانی ظلموندن گلیب تنگه
سنین جۏروندا حیراندیر قالیبدیر دای دیلی الکن
---------------------------
مرحوم امان اله سلطانی
سالوب عشقین گنه بو جانوما غۏغا گؤزلیم
عقلیمی الدن آلوب زلف چلیپا گؤزلیم
هر یانه من باخارام گؤزده سنی آختارارام
اختیاروم آپاروبدی بو تمنا گؤزلیم
آهو تک باخماقون آخر منی مجنون ائله دی
سنده اۏل باری بو یۏلدا منه لیلا گؤزلیم
خبرین یۏخ اۆرگیم لاله کیمین داغلاموسان
اۏخورام مدحیوی چۏن بلبل شیدا گؤزلیم
انتظارونده گۆلوم! آه چکرم یاش تؤکرم
گؤز یاشوم ائیلیوب اطرافومی دریا گؤزلیم
طاقتیم یۏخدی اۆرک پرپر ائدر گؤرمگیوه
قۏرخورام ائیلیه عشقین منی رسوا گؤزلیم
یانارام شمع کیمی گؤزدن آخار قان یاشلار
نئجه کی یوسفین عشقینده زلیخا گؤزلیم
منده عشقینده اۏ پروانه کیمین جان وئررم
قدمین گلسه دیریللم چو مسیحا گؤزلیم
آه وناله هامونی غملی ائدوب سلطانی
دای دیمه جانومی یاندوردی بو سئودا گؤزلیم
---------------------------
مرحوم امان اله سلطانی
گۆل فصلی گئچیب گلمدی جانان نه دی چاره
یۏخ بو اۆرگین دردینه درمان نه دی چاره
باخدوقجا یۏلا گؤزلریمه آغ گلیر آخر
سن سیز گزرم حسرت و حیران ، نه دی چاره
یاتمام گئجه لر صبحه تک اولدوز سانارام من
گؤزدن تؤکرم سیل کیمی القان نه دی چاره
چۏخ مشکل اۏلوب آیرولوقون رحم ائله دلبر
یۏخ صبر و قراریم سنه قربان نه دی چاره
سن سیز باهارون یۏخدی صفاسی گۆله باخمام
آچمور اۆرگیم باغ و گلستان نه دی چاره
اۏد جانومه وورموش اۏ ملاحتلی باخوشلار
یۏخ طاقتیم ای زلفلری ریحان نه دی چاره
من منتظرم تا کی گؤرم نور جمالون
پیشوازه تؤکم یۏللاریوا جان نه دی چاره
مجنونونام عشقنده منه رحم ائله ای گۆل
چؤل لر گزرم زار و پریشان نه دی چاره
آغلار گؤزولن یۏل لاره من چۏخلی زماندیر
حسرت باخارام ائلرم افغان نه دی چاره
سلطانی اگر عاشقن اۏ گۆل اۆزه، صبر ائت
هئی آغلاما کی "من سنه قربان نه دی چاره"
---------------------------
مرحوم امان اله سلطانی
